WAZIRI MKUU ATOA SIKU TATU KWA WAMILIKI WA VIWANDA NCHINI

Waziri Mkuu Kassim Majaliwa ametoa siku tatu kwa wafanyabiashara na wenye viwanda vya mafuta ya kupikia na sukari nchini kuhakikisha bidhaa hizo zinaendelea kupatikana katika maeneo yote na katika bei ya kawaida.

Amesema taifa hilo lina mafuta na sukari ya kutosha na hakufai kushuhudiwa uhaba wowote.

"Natoa siku tatu kuanzia kesho Alhamisi, Ijumaa na Jumamosi mafuta yote yaliyoko bohari yaondolewe yaendelee kusambazwa kama kawaida nchini kote ili kuondoa uhaba uliojitokeza," amesema Bungeni Dodoma baada ya Waziri wa Viwanda, Biashara na Uwekezaji, Bw. Charles Mwijage kutoa kauli ya Serikali kuhusu uhaba wa mafuta ya kupikia nchini Tanzania.

"Kamwe Serikali haitokubali kuchezewa na wafanyabiashara wasiowaaminifu," ameongeza.

Amesema kama uhaba wa bidhaa hiyo utaendelea, ifikapo Jumapili Serikali itaanza kufanya msako kwenye viwanda na maghala na kuchukua hatua kali kwa watakaobainika kuficha mafuta hayo.

Waziri Mkuu amesema takwimu zinathibitisha kwamba mafuta ya kupikia yaliyoingizwa nchini humo yanatosha, hivyo nchi haipaswi kuwa na uhaba.

Tuandikie Maoni Yako Hapa