MAMA JANETH MAGUFULI ATEMBELEA WAZEE

Mama Janeth Magufuli akiwasili Manyoni Mkoani Singida

MKE wa Rais wa Jamuhuri ya Muungano wa Tanzania, Dk.John Pombe Magufuli,Mama Janaeth Magufuli amewataka Watanzania kujenga utamaduni wa kuwatembelea pamoja na kuwasaidia watu wenye mahitaji maalumu wanaoishi kwenye vituo vilivyotengwa kwa ajili ya kuwahifadhi ili wazee hao nao waweze kuishi kama watu wengine.

Mama Magufuli ambaye amefuatana na Mke wa Waziri Mkuu,Bwana Majaliwa Kassimu Majaliwa,Bi Mary Majliwa ametoa wito huo alipokuwa akikabidhi msaada wa vyakula mbali mbali kwenye kituo cha Makazi ya wazee wasiojiweza cha Sukamahela,wilayani Manyoni Mkoani Singida.

Amesema ili wazee hao wanaoishi kwenye makambi maalumu waweze kufarijika na kujiona wapo sawa na watanzania wengine ni vyema kukawa na mazoea ya kuwatembelea mara kwa mara pamoja na kuwasaidia na kwamba watakapojenga utamaduni wa kuwasaidia mungu naye hataweza kuwaacha,ambapo hata hivyo amewatahadharisha kwamba wasije wakaishia kutoa misaada wakati wa ziara yake hiyo na badala yake misaada hiyo iwe endelevu.

Awali Mwenyekiti wa Chama Cha Mapinduzi (CCM) Mkoa wa Singida,Bi Marther Mlata akiwasilisha salamu za chama amewataja wadau mbali mbali walioungana naye kwa kuwasaidia wazee hao wakati Mbunge wa jimbo la Manyoni Mashariki,Bwana Danieli Mtuka akiwatahadharisha watu watakaojaribu kubadili matumizi ya msaada huo uliokabidhiwa kwa wazee hao wasiojiweza.

Mke wa Rais Dk.John Pombe Magufuli yupo mkoani Singida kwa ziara ya siku moja ambapo amekabidhi zaidi ya tani saba za vyakula mbali mbali kwenye kituo cha wazee wasiojiweza cha Sukamahela.