FARID MUSSA KUONDOKA KESHO USIKU

Jaffar Iddi Maganga

WINGA wa timu ya Azam FC Farid Mussa ataondoka nchini kesho usiku kuelekea Hispania baada ya kutumiwa tiketi ya ndege na klabu ya Tenerife inayoshiriki ligi daraja la pili nchini humo.

Faridi ataondoka kesho saa 5 usiku kwa ndege ya KLM ampapo atapitia Amsterdam, Barcelona hadi kufika Tenerife ambapo atajiunga na miamba hiyo kwa mkopo baada ya danadana za muda mrefu kuhusu safari yake.

Awali Tenerife walitaka kumsajili winga huyo kwa mkataba wa moja kwa moja baada ya kufaulu majaribio lakini dau ambalo walitaka kutoa lilikataliwa na Azam kwakua lilikuwa dogo kabla ya kukubaliana kumchukua kwa mkopo.

Ofisa Habari wa timu hiyo Jaffar Iddi Maganga amewaonyesha Waandishi wa Habari tiketi hiyo huku akisema kuondoka kwa winga huyo kutafungua milango kwa wachezaji wengine wa Tanzania kwavile atautangaza vyema mpira wa nchi hii.

"Kesho saa 5 usiku mchezaji wetu Farid ataondoka nchini kuelekea Hispania kwa ndege ya KLM kujiunga na timu ya Tenerife inayoshiriki ligi daraja la pili na tayari ametumiwa tiketi kwa ajili ya safari hiyo na sisi Azam tunamtakia kila la kheri katika maisha mapya ya soka" alisema Maganga.

Azam watalipa stahiki zote za mchezaji huyo ikiwemo mshahara kwa mujibu wa mkataba walioingia na klabu hiyo ya Hispania.