SHEKH WA MKOA SINGIDA ATOA WITO WA UPATIKANAJI WA PEMBEJEO MAPEMA NA TAHADHARI DHIDI YA MVUA ZA MASIKA.

                             

       Shekh wa mkoa wa Singida Issa bin Nassor akiongea na wanahabari ofisini kwake.

Singida,

 Desemba 2, 2024 –

Shekh wa Mkoa wa Singida, Shekh Issa Nassor, ametoa wito kwa mamlaka husika kuhakikisha pembejeo za kilimo zinapatikana mapema mkoani Singida kufuatia mvua za masika ambazo tayari zimeanza kunyesha katika maeneo mbalimbali ya mkoa huo.

Akizungumza leo katika ofisi yake iliyopo makao makuu ya Baraza Kuu la Waislamu Tanzania (BAKWATA) Mkoa wa Singida, Shekh Nassor alieleza kuwa kucheleweshwa kwa pembejeo kunaweza kusababisha athari kubwa kwa wakulima ambao hutegemea msimu wa mvua za masika kwa kilimo chao.

“Tunaiomba serikali na mamlaka husika kuleta pembejeo kwa wakati ili wakulima waweze kuanza shughuli za kilimo mapema. Huu ni msimu muhimu kwa mkoa wetu ambao unategemea kwa kiasi kikubwa kilimo cha mvua,” alisema Shekh Nassor.

Aidha, Shekh Nassor alitoa tahadhari kwa wazazi na waumini wa dini ya Kiislamu kuchukua hatua za kujikinga na madhara yanayoweza kusababishwa na mvua hizo, ikiwemo mafuriko na magonjwa ya mlipuko. Alisisitiza umuhimu wa kuhakikisha usalama wa watoto na familia wakati huu wa mvua.

“Ni jukumu letu sote, kama waumini na wazazi, kuhakikisha tunalinda familia zetu dhidi ya athari zinazotokana na mvua hizi. Tujiandae kwa dharura na tuhakikishe mazingira yetu ni salama,” aliongeza

Shekh Nassor pia alitoa rai kwa viongozi wa maeneo yenye athari kubwa za mvua kushirikiana na wananchi katika kutafuta suluhisho la haraka kwa changamoto zinazoweza kutokea, huku akitoa wito wa mshikamano na maombi katika kipindi hiki.

Taarifa hii inakuja wakati mvua za masika zikiwa tayari zimeanza kuleta changamoto katika baadhi ya maeneo mkoani Singida, zikiwemo barabara zisizopitika na mafuriko yanayohatarisha makazi ya watu.

Tuandikie Maoni Yako Hapa