NAIBU WAZIRI WA MAJI AMPONGEZA MKURUGENZI WA SUWASA KWA UTENDAJI BORA

                        

 Naibu Waziri wa Maji, Mhe. Mhandisi Kundo Andrea Mathew (Mb),akiongea na watumishi katika ukumbi wa bonde mjini Singida.

Mkurugenzi Mtendaji wa Mmamlaka ya majisafi na usafi wa mazingira Singida (SUWASA) Sebastian Warioba akiongea katika kikao kazi hicho.

Eng Lucas Mwinuka meneja Suwasa manyoni akitoa taarifa ya miradi mbalimabli ya maji inayofanyika katika wilaya ya Manyoni.

Singida

Na Mwandishi wetu

Naibu Waziri wa Maji, Mhe. Mhandisi Kundo Andrea Mathew (Mb), ameipongeza Mamlaka ya Majisafi na Usafi wa Mazingira Singida (SUWASA) kwa mafanikio makubwa chini ya uongozi wa Mkurugenzi Mtendaji wake, Sebastian Warioba.

Katika ziara ya kikazi mkoani Singida, Mhe. Kundo alibainisha kuwa SUWASA imeongeza mapato yake ya kila mwezi kutoka wastani wa shilingi milioni 290 mwezi Mei 2022 hadi shilingi milioni 380 kufikia Oktoba 2024. Pia, aliipongeza mamlaka hiyo kwa kudhibiti upotevu wa maji, ambao umepungua kutoka asilimia 33.3 Mei 2022 hadi asilimia 25 kwa sasa.

Mafanikio mengine yaliyotajwa ni ongezeko la wateja wapya kutoka 15,119 mwezi Mei 2022 hadi 21,211 mwezi Novemba 2024, hatua ambayo inaonyesha juhudi za SUWASA katika kuboresha huduma zake na kuwafikia wananchi wengi zaidi.

Mhe. Kundo alitoa pongezi hizo baada ya kupokea taarifa ya hali ya huduma za maji kutoka SUWASA, katika kikao kilichofanyika kwenye ukumbi wa Bonde la Kati. Kikao hicho kilihusisha Menejimenti za Taasisi zote zilizo chini ya Wizara ya Maji mkoani Singida, zikiwemo SUWASA, RUWASA, Bonde la Kati, Maabara ya Ubora wa Maji, Chuo cha Maji, KIUWASA, na MAUWASA.

Mhe. Kundo alisisitiza kuwa mafanikio haya ni mfano bora wa usimamizi thabiti na jitihada za pamoja za kuboresha huduma za maji kwa wananchi wa Singida na Tanzania kwa ujumla.

"Niwapongeze SUWASA kwa kazi nzuri mnayoendelea kufanya. Mafanikio haya yanaonyesha dhamira ya kweli ya kuboresha huduma za maji kwa wananchi. Endeleeni na juhudi hizi ili kufikia malengo makubwa zaidi," alisema Mhe. Kundo.

Mafanikio haya yanaonyesha mchango mkubwa wa SUWASA katika juhudi za Serikali ya Awamu ya Sita za kuboresha huduma za maji safi na usafi wa mazingira nchini.

 

Tuandikie Maoni Yako Hapa