WENYEVITI NA WATENDAJI WA MASHIRIKA YA UMMA KUJITATHIMINI

DODOMA

Wakati mashirika ya umma 40 nchini yanayojiendesha kibiashara yakishindwa kutoa gawio kwa Serikali, Msajili wa Hazina, Athuman Mbutuka amewataka wenyeviti na watendaji wakuu wa mashirika hayo kujitathimini kama wanafaa kuendelea kuongoza mashirika hayo.

Mbutuka ameyasema hayo leo Novemba 24, 2019 jijini Dodoma wakati wa hafla ya kupokea gawio na michango kutoka katika taasisi, mashirika na kampuni ambazo Serikali ya Tanzania ina hisa.

Amesema kati ya mashirika 81 yanayojiendesha kibiashara, mashirika 40 yameshindwa kutoa gawio kwa sababu yanajiendesha kwa hasara.

Amesema anataoa rai kwa wenyeviti na watendaji wa mashirika hayo wajitathmini kama wanatosha kuongoza mashirika hayo huku akiyataka mashirika ya huduma nayo kupunguza utegemezi kwa Serikali.

Msajili huyo amesema kiwango cha makusanyo ya gawio kwa serikali kimeongezeka kutoka Sh bilioni 161.04 mwaka wa fedha wa 2014/15 mpaka kufikia Sh1.05 trilioni mwaka 2018/19 ikiwa ni ongezeko la asilimia 552.

Mbutuka amesema ofisi yake imefanya uhakiki wa mali zinazomilikiwa na Serikali na kubaini kuwa kuna nyumba 337, viwanja 140, mashamba makubwa 10 na kampuni mbili ambapo amesema mali hizo zote zimerudishwa serikalini.

Amesema wamebaini kuna kampuni mbili ambazo hazipo kwenye orodha ikiwemo kampuni ya Songwe Water Company ambayo Serikali inamiliki kwa asilimia 100 na kampuni ya Liquid Storage ambayo Serikali ina hisa ailimia 40.