WAKULIMA WA TUMBAKU KANDA YA KATI WABADILI KILIMO

Na,Jumbe Ismailly MANYONI

WAKULIMA wa zao la tumbaku wa Chama kikuu cha wakulima wa tumbaku (CETCU) Kanda ya kati wameamua kubadili kilimo cha zao la tumbaku na kuingia kwenye kilimo cha mazao mchanganyiko kama vile pamba,korosho na alzeti baada ya makampuni yanayonunua tumbaku kubadilisha masharti ya upatikanaji wa mikopo wanayotoa.

Akisoma taarifa kwenye mkutano mkuu maalumu wa uchaguzi kwa niaba ya Mwenyekiti aliyemaliza muda wake,Bwanad Florence Mpana,katibu wa chama cha msingi Msemembo Amcos,Bwana Laurenti Mwang’imba amesema kutokana na hali ya kilimo cha tumbaku kuwa na vikwazo vingi,hivyo wamelazimika kubuni mradi wa kilimo cha mazao mchanganyiko.

Aidha Bwana Mpanda amefafanua kuwa mradi huo utasimamiwa na union ili mwisho wa siku union iwe na chanzo chake cha mapato yatakayosaidiana na ushuru unaotokana na mapato yanayopatikana kutoka kwenye Amcos.

Kwa mujibu wa mwenyekiti huyo aliyemaliza muda wake,Cetcu inahitaji shilingi 80,000/= kwa ajili ya shughuli za usafishaji kwa kutumia greda ambalo linafanyakazi kwa usimamiza wa uongozi wa Halmashauri ya wilaya ya Manyoni.

Kwa upande wake Mwenyekiti wa CETCU Kanda ya kati,Bwana Daudi Ngayaula amesisitiza kwamba kutokuwepo kwa mazingira rafiki kati ya Chama Kikuu cha Wakulima wa tumbaku Kanda ya kati (CETCU) Mkoa wa Manyoni,Wawekezaji pamoja na Taasisi za kifedha kulichangia chama hicho kukimbiwa na wanunuzi wa zao hilo na hivyo kusababisha wakulima kushindwa kulipa madeni yao wanayodaiwa na taasisi hizo za kifedha.

Aidha Bwana Ngayaula ameweka bayana kwamba endapo wawe ekezaji hao watakuwa na imani watawekeza Manyoni kwenye biashara ya tumbaku na hatimaye mwisho wa siku fedha zao watapata na wakulima watapata faida.

Kwa upande wake Meneja wa CETCU Kanda ya kati,Bwana Simon Hoja amewataka wakulima wa zao la tumbaku kuhakikisha wanapanda kwanza miti na kujenga mabani ya kisasa kabla ya kuanza kilimo cha zao la tumbaku.

Akifungua mkutano huo maalumu,Katibu tawala wa wilaya ya Manyoni,Bi Rahabu Mwagisa ameweka bayana kwamba kati ya vyama vya ushirika vya msingi vya tumbaku 21 vilivyokuwepo,lakini kutokana kutokana na changamoto mbali mbali za uongozi,vyama 16 vimekosa usajili kufuatia mzigo wa madeni ya muda mrefu ya zaidi ya shilingi bilioni 11.