MADIWANI MASHINE ZA EFD LAZIMA ZITUMIKE KUTOLEA RISITI DC MTATURU

Mkuu wa wilaya ya Ikungi na kaimu mkuu wa wilaya ya Singida Mh Miraji Mtaturu akizungumza na madiwani wa manispaa ya katika kikao cha baraza la bajeti.

KAIMU mkuu wa wilaya ya Singida,Miraji Mtaturu,ameagiza mkakati wa kutoa huduma ya chakula katika shule za msingi na sekondari,utekelezwe kwa kasi kubwa,ili pamoja na mambo mengine,taaluma iweze kupanda.

Mtaturu ambaye ni mkuu wa wilaya ya Ikungi,ametoa agizo hilo jana (1/3/2017) wakati akizungumza mbele ya kikao cha kawaida baraza la madiwani, kilichofanyika kwenye ukumbi wa mikutano wa manispaa hiyo.

Akisisitiza,alisema halmashauri ya manispaa ya Singida,ikitaka ufaulu uongezeke ni lazima huduma ya chakula cha mchana, ikapatikane katika shule zake.

“Wapo baadhi ya wanafunzi wanatembea kilometa tano kwenda shuleni,na mbaya zaidi anatoka nyumbani hata bila kunywa uji.Huyu kuna uwezekano mkubwa akalala uzingizi darasani.Lakini kama kuna huduma ya chakula,hilo halitatokea”,alisema kaimu DC huyo.

Aidha,Mtaturu amezitaka kamati za shule ziwajibike kwa suala la chakula,sambamba na kuhakikisha miundo mbinu inaboreshwa.

Katika hatua nyingine,amewakumbusha madiwani wajibu wao wa kusimamia mapato na matumzi ya mapato ya halmashauri.

Akisisitiza,alisema mashine EFD za kutolea stakabadhi/risiti ni lazima zitumiwe na wakusanya mapato,ili kuondoa uwezekano wa udokozi wa mapato.

“Kwenye vyanzo vya mapato,wekeni makadrio ili yasipofikiwa,mpate uwezo wa kuhuji ni kwa nini hayajafikiwa.Hatua hiyo itasaidia kuthibiti wadokozi kujinufaisha binafsi”,alisema.

Aidha,kaimu mkuu huyo wa wilaya,amewaomba madiwani kuanzisha dawati la mapokezi ya kero za wananchi,ili yaweze kushughukiwa mapema kabla hayajaleta athari kubwa.

Wakati huo huo,Mtaturu amewaomba wakahimize wakulima kutumia mvua hizi zinazoendelea kunyesha,kulima mazao yanayokomaa mapema.

Pia amewataka wahakikishe kila kaya inapanda miti kumi, ili siku ikifika halmashauri ya manispa Singida,iwe ya kijani wakati wote.