WIMBI LA KUWATUMBUA VIONGOZI WA NGAZI YA VIJIJI LINAENDELEA MKOANI SINGIDA

Diwani wa kata ya Unyanga Geofrey Mdama akizungumza na wananchi katika mkutano huo.

WIMBI la kuwaondoa viongozi wa serikali za vijiji limezidi kupamba moto Mkoani Singida ambapo katika Kijiji cha Unyianga,Manispaa ya Singida mkutano mkuu wa Kijiji hicho umemvua madaraka Mwenyekiti wa Kijiji,Bwana Sombi Omari Goda pamoja na wajumbe wa serikali ya Kijiji hicho kutokana na tuhuma za kushindwa kusoma taarifa ya mapato na matumizi ya Kijiji hicho kwa kipindi cha miaka mitatu.

Aidha wananchi hao walioonekana wakiwa na tayari na maamuzi ya tuhuma kabla ya mkutano huo huku wakiwa na hasira kwa viongozi wao hao wamezitaja tuhuma zingine za kuwaondoa madarakani wawakilishi wao hao kuwa ni kushindwa kusimamia mapato na matumizi ya fedha za Kijiji hicho.

Maamuzi hayo yamefikiwa kwenye mkutano mkuu wa mwaka wa Kijiji cha Unyianga uliofanyika kwenye viwanja vya mikutano vya ofisi za Kijiji hicho na kupiga kura za kumkataa mwenyekiri wa Kijiji pamoja na wajumbe wote wa serikali ya Kijiji hicho na kuwataka wakae pembeni kupisha uchunguzi wa tuhuma zinazowakabili.

Katika mkutano huo uliohudhuriwa na zaidi ya watu mia tatu,akiwemo diwani wa kata ya Unyianga,Bwana Geofrey Mdama nusura uvunjike baada ya Mwenyekiti wa Kijiji hicho na baadhi ya wajumbe wa serikali ya Kijiji kuwashauri wananchi hao kwamba kwa kuwa mtendaji aliyepaswa kusoma taarifa ya mapato na matumizi hakuwa tayari kusoma taarifa hiyo,hivyo hawana budi kusamehe yote yaliyojitokeza na kuanza kukijenga upya Kijiji chao.

Hata hivyo wananchi hao bila kujali itikadi za vyama vyao na wala jinsia zao kwa pamoja waliamua kuanza kupiga kelele na kususia kuendelea kuwepo kwenye uwanja wa mkutano huo na kuondoka na kuwaacha viongozi wakiwa wamekaa kwenye meza ambapo baada ya kushauriwa na ofisa mtendaji wao ndipo walipoamua kurudi kuendelea na mkutano huo.

Kwa upande wake Ofisa Mtendaji wa kata ya Unyianga,Bi Habiba Juma amewahakikisha wananchi hao kwamba walichokuwa wakidai ni haki yao kabisa ya kusomewa taarifa ya mapato na matumizi kila baada ya miezi mitatu na kwamba kuanzia mwezi wa kumi hadi sasa hakuna mapato yeyote yaliyokusanywa kwenye vibanda vilivyopo Kijijini humo.

Naye diwani wa kata ya Unyianga,Bwana Geofrey Mdama ameweka bayana kuwa baada ya wananchi walioanza kususia mkutano huo kurejea tena kwenye viwanja hivyo,ametumia fursa hiyo kuwataka watoe maamuzi wanayodhani yataleta tija kwa upande wao na Kijiji hicho kwa ujumla na ndipo walipopendekeza kura ipigwe kupata muafaka wa suala hilo.