MKURUGENZI MTENDAJI WILAYA YA HANANG APIGA STOP MICHANGO MASHULENI

Mkurugenzi wa Halmashauri ya Hanang BwBryceson Kibassa akisikiliza jambo pembeni ni mwenyekiti wa Halmashauri ya wilaya Mh George Bajuta.

Madiwani wa Halmashauri ya wilaya ya Hanang wakimsikiliza mkurugenzi (hayupo kwenye picha) katika mkutano maalum wa baraza la madiwani.

Na,Jumbe Ismailly HANANG

MKURUGENZI Mtendaji wa Halmashauri ya wilaya ya Hanang,Mkoani Manyara,Bryceson Kibassa amepiga mafuruku walimu wa shule za msingi kuwatoza wazazi na walezi wa watoto michango ya aina yeyote ile na kuwahakikishia kwamba hakuna mtoto wa wilaya hiyo atakayetakiwa kukosa elimu kwa kisingizio cha kutolipa michango.

Akitoa tahadhari hiyo kwenye mkutano maalumu wa Baraza la madiwani lililokutana kupitisha mapendekezo ya makisio ya mpango na bajeti ya mapato na matumizi kwa mwaka wa fedha wa 2018/2019 uliofanyika katika ukumbi wa mikutano wa Halmashauri hiyo,Bwana Kibassa amesisitiza kwamba kusiwepo na mtoto yeyote yule wa Hanang ambaye atashindwa kwenda kusoma shule kwa kisingizio wa mchango wa aina yeyyote ile.

Kwa mujibu wa Mkurugenzi huyo michango inayoruhusiwa ni ile tu ya kijamii wanayokubaliana kwa ajili ya kuboresha miundombinu bila kugusa ile michango ambayo kwenye waraka inatajwa kwamba,isiwe kikwazo cha kuzuia mtoto yeyote kwenda shuleni.

Hata hivyo Bwana Kibassa amesisitiza kwamba agizo hilo lisije likatafsiriwa kwamba michango ya miundombinu ambayo inapitishwa katika vikao halali ya kijamii imezuiliwa,na badala yake kinachozuiwa ni ile michango ambayo imefafanuliwa vizuri kwenye waraka na endapo hawatakuwa wameuelewa waraka huo wasisite kuomba ufafanuzi.

Naye Makamu Mwenyekiti wa Halmashauri hiyo,Bwana Charles Yona licha ya kuahidi kwa niaba ya madiwani kutoa ushirikiano kwa watendaji wa Halmashauri hiyo,lakini ameonyesha kutoridhishwa na hali ya mapato yaliyopatikana mpaka katika kipindi cha robo ya pili ya kwamba kuwa siyo nzuri huku kukiwa kuna changamoto lukuki katika kila kata.

Akisoma mapendekezo ya makisio na bajeti ya mapato na matumizi kwa mwaka wa fedha wa 2018/2019 ya jumla aya shilingi bilioni 38,435,735,692,Ofisa Mipango wa Halmashauri hiyo,Bwana Pantaleo Mkangara amesema kati ya kiasi hicho cha fedha mapato ya ndani yasiyo na masharti ni 2,493,330,000/= na mapato yenye masharti ambayo ni ruzuku ya matumizi mengineyo ikiwemo fidia ya vyanzo vilivyofutwa ni 470,172,000/=.

Akifunga mkutano huo maalumu wa baraza,Mwenyekiti wa Halmashauri hiyo,Bwana Gorege Bajuta amewakumbusha watendaji wa Halmashauri hiyo juu ya umuhimu wa kupunguza hoja za ukaguzi na kuonya kuwa hawategemei kuona Halmashauri hiyo ikiendelea kupata hati chafu au hati yenye mashaka,labda tu kuwepo hoja za nyuma zilizokataliwa kupitishwa.