WENYEVITI WA SERIKALI ZA MITAA WAASWA KUWA SAUTI YA WANANCHI NA KUFANYA KAZI KWA WELEDI

 

Mkurugenzi wa Manispaa ya Singida Joanfaith Kataraia akiongea na wenyeviti na wajumbe kabla ya kula kiapo.

Hakimu mfawidhi wa Mahakama ya Utemini Singida Mhe, Ferdinand Njau akiwaapisha wenyeviti na wajumbe waliyochaguliwa katika ukumbi wa FDCT Singida.

                          

Mbunge wa Jimbo la Singida mjini Mhe, Musa Sima wa kwanza kulia na wapili ni Diwani wa kata ya Utemini Mhe, Kawawa Munjori akifuatiwa na katibu wa Mkoa na makatibu wa Jumuiya ya Wazazi,Wanawake na UVCCM wilaya.

                             

Na Mwandishi Wetu

Wenyeviti na wajumbe wateule wa Serikali za Mitaa katika Manispaa ya Singida wameapishwa rasmi kuanza kutekeleza majukumu yao mbele ya Hakimu Mkazi Mfawidhi wa Mahakama ya Mwanzo Utemini, Ferdinand Njau.

Katika hafla hiyo, Mkurugenzi wa Manispaa ya Singida, Joanfaith Kataraia, aliwataka viongozi hao kuhakikisha wanawatumikia wananchi kwa uadilifu na kufuata taratibu na sheria za nchi. Aidha, aliwasisitiza kutatua migogoro bila upendeleo, huku wakizingatia weledi katika utendaji wao wa kazi.

Mwenyekiti wa Umoja wa Wanawake wa CCM (UWT) Wilaya ya Singida Mjini, Naomi Devid, aliwataka viongozi hao kufanya kazi kwa ushirikiano na kuepuka vitendo vya rushwa ambavyo huathiri ufanisi wa kazi na kuharibu taswira ya uongozi. Alisisitiza umuhimu wa kufuata maadili na taratibu za utumishi wa umma.

Baadhi ya wenyeviti na wajumbe walioapishwa waliahidi kufanya kazi kwa umoja na kuzingatia weledi, huku wakiwatoa hofu wananchi kuhusu usimamizi wa mali na nyaraka za serikali, zikiwemo mihuri ya ofisi.

Wito kwa viongozi hao ni kuhakikisha kuwa wanakuwa kiungo thabiti kati ya serikali na wananchi kwa kusikiliza na kutatua changamoto za jamii kwa uwazi na haki.

Tuandikie Maoni Yako Hapa