RC AWAKUTANISHA VIONGOZI WA VYAMA VYA SIASA, ASISITIZA AMANI

 

Hizi ni picha mbalimbali zilizochukuliwa wakati wa kikao kilichoongozwa na Mkuu wa Mkoa wa Singida, Mhe. Halima Dendego, akizungumza na viongozi wa vyama vya siasa. Kikao hiki kililenga kuhimiza amani, mshikamano, na utulivu kuelekea kufungwa kwa kampeni za uchaguzi wa ngazi ya Serikali za Mitaa.

Singida

 Na Mwandishi wetu

Mkuu wa Mkoa wa Singida, Mhe. Halima Dendego, amekutana na viongozi wa vyama vyote vya siasa vilivyopo mkoani Singida kwa lengo la kusisitiza umoja, amani, na utulivu kuelekea uchaguzi unaotarajiwa kufanyika tarehe 27 Novemba 2024. Kikao hicho, kilichofanyika leo asubuhi katika Ofisi ya Mkuu wa Mkoa, kimejumuisha wawakilishi kutoka vyama mbalimbali vya siasa kama CHADEMA, CUF, Demokrasia Makini, UMD, CCM, NLD, NRA, ACT-Wazalendo, UDP, na CHAUMA.

Akizungumza katika kikao hicho, Mhe. Dendego aliwapongeza wajumbe wa vyama vya siasa kwa kufanya kampeni za amani na kuhimiza kuendeleza utulivu uliopo hadi siku ya uchaguzi na hata baada ya uchaguzi.

"Sisi sote ni ndugu. Uchaguzi wa Tanzania ni wa Singida pia, na amani ya Tanzania ni ya Singida. Tuweke tofauti za vyama na dini pembeni. Serikali imekamilisha taratibu zote, hivyo tarehe 27 ninaomba tuendeleze amani na kuwaunga mkono watakaochaguliwa," alisema RC Dendego.

Aidha, alihakikisha usalama wa kutosha wakati wa kampeni, uchaguzi, na baada ya uchaguzi. Alisisitiza umuhimu wa kutumia siasa za ushindani kwa njia ya sera badala ya vurugu, akisema ni msingi bora wa maandalizi ya uchaguzi mkuu wa mwaka 2025.

"Tushindane kwa sera na mipango, si kwa vurugu. Tuijenge amani mwaka huu kwa msingi bora wa uchaguzi wa mwaka 2025," aliongeza.

Naye Mwenyekiti wa ACT-Wazalendo Mkoa wa Singida, Hamis Labia, alielezea furaha yake kwa kuwa na nafasi ya kukutana na viongozi wa vyama vingine, akisema hatua hiyo ni muhimu kwa kujenga urafiki na mshikamano, pamoja na kujadili changamoto kwa pamoja.

Kwa upande wake, Katibu wa CHADEMA Mkoa wa Singida, Samweli G. Malo, alisisitiza umuhimu wa uchaguzi wa haki na uwazi kwa kushindana kwa misingi ya kiitikadi na kisera. Alitoa wito wa kuimarisha ulinzi wa kura na kusisitiza uaminifu kwa mawakala wa vyama. Pia, alibainisha kuwa CHADEMA imeweka wagombea 3,240 katika vijiji 217 kati ya vijiji 442 vya mkoa wa Singida.

Mwenezi wa CCM Mkoa wa Singida alielezea kuridhishwa kwake na hali ya utulivu ya uchaguzi mwaka huu, akibainisha kuwa kampeni zimeendeshwa kwa amani na wagombea wamekuwa wakinadi sera zao kwa utulivu wa hali ya juu.

Kikao hiki kimeacha ujumbe mzito wa mshikamano na kuimarisha amani mkoani Singida wakati huu wa uchaguzi.

Tuandikie Maoni Yako Hapa