HALMASHAURI YA WILAYA YA IKUNGI KUJENGA SHULE NA CHUO CHA UFUNDI KWA AJILI YA KUENDELEZA ELIMU.

Mkurugenzi Mtendaji Halmshauri ya Wilaya ya Ikungi Justice Kijazi (Picha kutoka maktaba yetu)

Na Mwandishi wetu

Halmashauri ya Wilaya ya Ikungi mkoani Singida imepanga kujenga shule nne za vidato vya tano na sita pamoja na chuo kimoja cha ufundi (VETA) katika mwaka wa fedha 2024/2025. Hatua hii inalenga kuwawezesha wanafunzi wote wanaofaulu masomo ya sekondari kuendelea na masomo yao, huku wale wa shule za msingi wakipata mafunzo ya ufundi ili kuwa na ujuzi wa kujiajiri baadae.

Afisa Elimu wa Halmashauri ya Wilaya ya Ikungi, Dkt. Ngwano John, alieleza hayo katika mahafali ya 24 ya Shule ya Sekondari Sepuka, ambapo wanafunzi 48 walihitimu kidato cha nne. Dkt. Ngwano alieleza kuwa Serikali ya Awamu ya Sita inayoongozwa na Rais Dkt. Samia Suluhu Hassan imewekeza fedha nyingi kwenye elimu nchini, ikilenga kuwawezesha watoto wote kupata elimu na kushiriki katika maendeleo ya kiuchumi kupitia fursa zilizopo.

Halmashauri imepanga kujenga madarasa mapya na kukarabati majengo chakavu katika shule za msingi na sekondari. Aidha, shule nne—Kintandaa, Sepuka, Unyahati, na Nkuhizitajengewa majengo ya kisasa kwa ajili ya vidato vya tano na sita, huku chuo cha ufundi kikiwa Utaho.

Mkurugenzi Mtendaji wa Halmashauri ya Ikungi, Justice Kijazi, alifafanua kuwa Wizara ya Elimu itajenga majengo nane ya kisasa ya madarasa kwa vidato vya tano na sita katika shule hizo. Majengo mengine kama vile ya utawala, mabweni, mabwalo, maktaba, na nyumba za walimu pia yatajengwa. Ujenzi huu utagharimu takriban shilingi bilioni 2.7, ikijumuisha chuo cha ufundi, ili kuhakikisha kuwa wanafunzi wa Ikungi wanapata elimu bora kwa mujibu wa maelekezo ya Rais Samia.

Mkuu wa Shule ya Sekondari Sepuka, Deogratus Makene, alisema kuwa shule yake ina jumla ya wanafunzi 371 na walimu 15. Shule hiyo ina madarasa 12, maabara, jengo la utawala, na bweni, lakini inakabiliwa na changamoto ya upungufu wa vifaa vya TEHAMA. Aidha, Makene alieleza kuwa matokeo ya mtihani wa kidato cha nne 2023 hayakuwa mazuri, lakini wana matarajio ya matokeo bora zaidi mwaka huu kutokana na juhudi za walimu na wanafunzi.

Afisa Mtendaji wa Kata ya Sepuka, Bahati Mkungile, alieleza kuwa walimu wamejitahidi kuboresha ufaulu wa wanafunzi kwa kushirikiana na wazazi. Katika kusaidia masomo ya TEHAMA, wazazi, walimu, na wanafunzi walichanga shilingi milioni 2.134 kwa ajili ya kununua kompyuta, huku walimu wa masomo hayo wakiwa tayari kwa ajili ya kufundisha mwakani.