WANANCHI WAJIEPUSHE NA VITENDO VYA RUSHWA

Afisa uchunguzi kiongozi msaidizi Takukuru Mkoa wa Singida na akiongea na wakuu wa taasisi mbalimbali binafsi zisizo za kiserikali mjini Singida..

SINGIDA

Na Mwandishi wetu

Jamii imeaswa kuepukana na vitendo vya rushwa hasa katika kipindi hiki cha kuelekea uchaguzi wa serikali za mitaa na uchaguzi mkuu hapo mwakani ili kuchagua viongozi wanaofaa na watakao isaidia jamii na Taifa kwa ujumla.

Hayo yamesemwa na Afisa uchunguzi kiongozi msaidizi kutoka Taasisi ya kuzuia na kupambana na rushwa TAKUKURU Mkoa wa Singida Onesmo Mdegela wakati wa jukwaa la mwaka la mashirika yasiyo ya kiserikali Mkoa wa Singida lililofanyika katika ukumbi wa RC Mission mjini hapo.

Amesema wananchi wanatakiwa kuwa makini na kuepuka kupokea pesa au zawadi zingine kutoka kwa wagombea kwani zitawafanya washindwe kufanya maamuzi sahihi ya kuchagua viongozi watakaowafaa.

Anasema baadhi ya wagombea ambao hawana sifa za kuongoza watu wamekuwa wakitoa vitu mbalimbali kwa jamii au mtu mmoja mmoja ili kuwashawishi wananchi wawachague wakati wa uchaguzi ambapo baada ya kuchaguliwa hutumia nafasi hiyo kurudisha fedha alizogawa bila kujali changamoto za jamii.

Ametumia nafasi hiyo kuwasihi wananchi kutoa taarifa pale wanapohisi kuna vitendo vyovyote vinaendelea katika jamii vya kutoa au kupokea rushwa ili kulinda haki ya kila mwananchi na jamii yote.