KIJANA AJINYONGA NA CHANDARUA MPAKA KUFA

KIJANA mmoja mkazi wa kijiji cha kintandaa kata ya Mtunduru, wilaya ya Ikungi mkoani Singida Hashimu Jumanne (16) amekutwa amekufa kwa kujinyonga kwa kutumia kamba ya chandarua anayotumia mama yake kufungia kuni.

Akizungumza na mwandishi wa gazeti hili juzi katika kijiji hicho mama yake mzazi Mwasiti Hasaani Athumani amesema tukio la kujinyonga mwanae lilitokea Ijumaa 25/5/2018 asubuhi na yeye akamgundua saa 7:00 mchana kwamba amejinyonga kwenye mti uliopo ndani ya shamba lao wakati akimtafuta aende kula na wenzake.

Mwasiti alisema siku hio asubuhi yote Hashimu alikuwa anachota maji ya kutumia nyumbani kwa baiskeli hadi saa 4:00 asubuhi yeye akaenda kukata kuni na aliporudi akaanza kuwapikia chakula hadi saa 6:00 mchana akaanza kumtafuta ili aje kula akamkosa.

Aliendelea kueleza yeye aliporudi kwenye kuni alimkuta Hashimu amechukua msumari mkubwa anatoboa matundu ukutani ili awajengee njiwa zake kibanda lakini alimkataza kutoboa ukuta akamnyanganya msumari huo hali hiyo ilisababisha mabishano makali kati yao, hapo hawakuonana tena hadi alipomkuta amekufa juu ya mti.

Aidha afisa Mtendaji wa kijiji hicho cha Kintandaa Zuhura Amani Kiula amesema amepata taarifa hiyo saa 8:00 mchana akiwa ofisini kwake kutoka kwa soa Shabani kwamba katika eneo lake kijana mmoja amekufa kwa kujinyonga.

Zuhura amesema alifika akafanya mahojiano na wazazi wake pamoja na ndugu zake kujua vyanzo vyake lakini hakuona jambo gumu lililojitokeza kuhusiana na tukio hilo lililomfanya kijana Hashimu achukue maamuzi magumu hadi afike hatua ya kujinyonga.

Kwa upande wake Afisa Mtendaji kata ya Mtunduru Adamu Jambau amethibitisha kuwepo kwa tukio hilo la kujinyonga kwa kijana huyo katika kijiji hicho na katika mahojiano na wazazi wake hakuona tatizo gumu ila tu marehemu hakuelewa lugha na mama yake juu ya kujenga banda la njiwa zake.

Polisi walifika wakafanya uchunguzi na mahojiano na wazazi juu ya tukio hilo na baadae na viongozi wa Kijiji wakabaini hakuna jambo gumu lililomfanya marehemu afikie maamuzi hayo magumu zaidi ya malumbano na mama yake wako huru marehemu azikwe na hakuna mtu aliyechukuliwa na polisi kwa mahojiano.