MATUKIO YA MEI MOSI SINGIDA

Wilaya ya Ikungi ni maalufu sana kwa kilimo cha VIAZI LISHE.

Risala ilisomwa na Ibrahim Mluwa

Mkuuwa mkoa Dr Rehema Nchimbi

Ligi ya kina mama kuanza kutimua vumbi katika wilaya zote mkoani Singida Dr Nchimbi akabidhi mipira kwa maafisa michezo kila wilaya kwa maandalizi.

Singida kuku ni mboga ya kawaida.

Ibrahim Mluwa akipokea zawadi

Zawadi kutoka TANESCO

WANANCHI mkoani Singida,wamempongeza rais Magufuli kwa hatua yake ya ‘kunyoosha’ watumishi wa umma ambao kwa sasa,wamerejesha nidhamu na uadilifu kwa kiwango cha kuridhisha.

Akizungumza kwenye kilele cha maadhimisho ya siku ya wafanyakazi dunaini (mei mosi)mkuu wa mkoa wa Singida,Dk.Rehema Nchimbi,amesema pongezi hizo amepewa na wananchi mbalimbali na kwa nyakati tofauti.

Alisema wananchi hao kwa ujumla wao,wamesema chini ya serikali ya awamu ya tano,watumishi wa umma,wamebadilika sana na sasa wanatoa huduma kwa ukarimu mkubwa,wepesi na uharaka zaidi.

“Huko nyuma watumishi wa umma wengi walikuwa wana urasimu wa hali ya juu.Walikuwa wakitoa huduma huku macho na akili zao zikiwa kwenye ‘wathasp’.Mbaya zaidi mwananchi akipeleka kero zake,wanamwona ni msumbufu.Hivi sasa mambo ni tofauti,kero za wananchi zinatafutiwa majibu na majawabu kwa wakati”,alisema Dk.Nchimbi.

Hata hivyo,mkuu huyo wa mkoa,amesisitiza kwamba watumishi wa umma wasibweteke waongeze bidii zaidi katika kuwatumikia wananchi,ili pamoja na mambo mengine,waendelee kuipenda na kuiamini serikali yao.

Katika hatua nyingine,Dk.Nchimbi amewakumbusha waajiri juu ya wajibu wao wa kuwatambua,kuwathamini,kuwaheshimu na kuwapenda waajiriwa wao.

Alisema kwa njia hiyo,miradi,huduma au shughuli yo yote ya mwajiri itatekelezwa/itafanyika kwa ufanisi mkubwa.

“Ninyi wakurugenzi wa halmashauri za wilaya na manispaa,jengeni tabia ya kuwatambua wafanyakazi wenu.Wapendeni na muwathamini wafanyakazi wote walio chini yenu.Hawa wafanyakazi mnaowaongoza,sio maadui wenu,shirikianeni katika kuwatumikia wananchi”,alisema na kuongeza;

“Ukiona mtumishi anafanya mambo yanayokidhaza na sheria,kanuni na utaratibu,usimkaripie wala kumtega,mtafutie afisa ustawi wa jamii.Kwa vyo vyote afisa ustawi wa jamii atamrejesha kwenye mstari stahiki na mambo yatakwenda vizuri”.

Aidha, mkuu huyo wa mkoa,amekemea tabia mbaya ya baadhi ya wakuu wa idara/vitengo ya kuwa na mahusiano ya kimapenzi na wafanyakazi wa kike walio chini yao.

“Wakuu hawa wa idara/vitengo wanakiuka sheria,kanuni na taratibu kwa kuanzisha shughuli ya kimapenzi humo humo kazini.Wakati mwingine wanafanya mapenzi na wake za watu.Tabia hii haikubaliki na haivumiliki hata kidogo.Viongozi au wakuu wa idara/vitengo wenye tabia ya aina hii,waiache mara moja”,alisema Dk.Nchimbi.

Pia Dk.Nchimbi amemwagiza mwenyekiti wa TUKUTA mkoani hapa,kumpatia orodha ya majina ya watumishi wa umma wenye tabia mbaya ya kuwapinga ovyo wake zao.

“Wapo wanaume ambao ni watumishi wa umma,wakiudhiwa nje….hasira zote wanazipeleka nyumbani kwa mke wake na kuanza kumwangushia vipigo vikali.Tukipata orodha yao,tutakaa nao kwa lengo la kuwarekebisha tabia.Kama mume na mke hawaelewani,mwanaume husika hawezi kufanya kazi zake kwa ufanisi.”amefafanua.

Wakati huo huo,mkuu huyo wa mkoa,amewahimiza watumishi wa umma,wasikubali kuyumbishwa na wanasiasa.Wakikubali kuyumbishwa,ajira zao zitakuwa hatarini.

Mmoja wa wananchi waliohudhuria maadhimisho hayo,Sombi Hangida,alikiri kwamba ni kweli watumishi wa umma wamebadilika mno,na sasa wanatoa huduma bila kuomba rushwa na wamekuwa na lugha rafiki kwa wananchi.

Awali mwenyekiti wa TUKUTA mkoa wa Singida,Aaran Jumbe,amehimiza mabaraza ya wafanyakazi maeneo ya kazi,yafanyike kwa mujibu wa sheria,kanuni na taratibu.