MBALONI KWA KUKUTWA NA MADAWA YA KULEVYA IGUNGA- TABORA

Na,Jumbe Ismailly

IGUNGA

WAKAZI watatu wa mjini Igunga wanashikiliwa na polisi wilayani Igunga,Mkoani Tabora kwa tuhuma za kukutwa na madawa ya kulevya aina ya Heroin.

Walioshikiliwa na jeshi hilo kutokana na tuhuma hizo kuwa ni pamoja na Mohamedi Hamisi (34) mkazi wa mtaa wa Mwayunge,aliyekutwa akiwa na kete 7 za madawa hayo ya kulevya aina ya Heroin,Steveni Mtani(39),mkazi wa mtaa wa stoo aliyekamatwa na kete tano za madawa ya kulevya aina ya Heroin na Mussa Salum (37) mkazi wa mtaa wa Mwayunge ambaye alikamatwa na gramu 2 za madawa ya kulevya aina ya Heroin.

Akithibitisha kukamatwa kwa watu hao,Mwenyekiti wa serikali ya Mtaa wa Mwayunge,kupitia Chama Cha Demokrasia na Maendeleo (CHADEMA ) Bwana Abeli Shampinga amesema polisi kwa kushirikiana na yeye walimkamata Mohamedi Hamisi saa 12:30 alfajiri akiwa na kete 7 akiwa amezificha kwenye mfuko wa plastiki,au maarufu kwa jina rambo huku akiwa amezihifadhi kwenye sinki la choo katika nyumba anayoishi.

Mwenyekiti huyo hata hivyo ametumia fursa ya zoezi hilo kulipongeza jeshi la polisi kwa kazi nzuri ya kufanikisha kukamatwa kwa madawa hayo ambayo yamekuwa yakiharibu maisha ya vijana huku akiwataka wananchi kuunga mkono juhudi za Rais Magufuli za kuwafichua wauzaji pamoja na watumiaji ili waweze kufikishwa katika vyombo vya sheria.

Hata hivyo kwa upande wake Kamanda wa polisi Mkoa wa Tabora,Kamishna Msaidizi wa polisi, Willbroad Mtafungwa amethibitisha kukamatwa kwa vijana hao,julai,22,mwaka huu saa 12:30 alfajiri katika Mtaa wa Mwayunge,kata ya Igunga mjini wakiwa na madawa hayo ya kulevya aina ya Heroin.

Kamanda Mtafungwa hata hivyo aliweka bayana kwamba watuhumiwa wote watatu wanatarajiwa kufikishwa Mahakamani Julai,24 mwaka huu na kutoa onyo kali kwa wale wote wanaojihusisha na uuzaji na utumiaji wa madawa ya kulevya kuacha mara moja.

Kwa mujibu wa Kamanda Mtafungwa jeshi la polisi Mkoa wa Tabora linaendelea na operesheni ya kuwasaka katika wilaya zake zote wanaojihusisha na tabia hiyo.