UCHAGUZI MDOGO WA CHAMA CHA SOKA MKOA SINGIDA (SIREFA)

CHAMA cha mpira wa miguu mkoa wa Singida (SIREFA),kinatarajia kufanya uchaguzi mdogo kuziba mapengo jumamosi mei 20 mwaka huu.

Uchaguzi huo unaosubiriwa kwa hamu kubwa na wapenzi wa soka mkoani Singida,unatarajiwa kufanyika kwenye ukumbi wa mikutano chuo cha maendeleo ya wananchi (FDC),mjini hapa.Na utaanza saa tatu asubuhi.

Nafasi zinazongombewa ni pamoja na nafasi ya mwenyekiti iliyoombwa na Hussein Zuberi Mwamba,Samweli Nakei,Erasto Sima,Mussa Ramadhani Sima na Iddi Mnyampanda.

Nafasi ya makamu mwenyekiti,imeombwa na Ally Ramadhan Nkhangaa pekee,wakati nafasi ya mweka hazina msaidizi, imeombwa na mgombea pekee Hamza Mussa Ntoga.

Nafasi ya katibu mkuu imeombwa na Rashidi Mohammed Komba na Edward Ihonde.Nafasi ya mjumbe mkutano mkuu TFF,imeombwa na Manase Abel na Nufus Ndee.

Uchaguzi huo mdogo,unafanyika baada ya viongozi waliochaguliwa mwishoni mwa mwaka jana kwenye nafasi hizo, kujiuzulu kutokana na sababu mbalimbali,ikiwemo sifa ya elimu.

Akizungumza na waandishi wa habari ofisini kwake jana,mwakilishi wa vilabu SIREFA,Gabriel Gunda,alisema maandalizi yote muhimu yanaendelea vizuri na yatatarajiwa kukamilika kwa wakati.

Gunda alisema kuwa mkutano huo mdogo wa uchaguzi ambao alitarajiwa waziri wa mambo ya ndani Mwagullu Nchemba kuwa mgeni rasmi,hatafika kutokana na sababu zisizozuilika.

“Kwa hiyo sasa mkuu wa mkoa Dk.Rehema Nchimbi anatarajiwa kuwa mgeni rasmi.Tunatarajia pia mjumbe kutoka kamati ya uchaguzi TFF atakuwepo”,alisema.

Alisema wapiga kura katika uchaguzi huo,ni mwenyekiti,katibu na mjumbe wa mkutano mkuu SIREFA kutoka wilaya zote za mkoa wa Singida.

“Pia atakuwepo mwakilishi wa vilabu kutoka wilaya zote sita.Vile vile wajumbe kutoka vyama vya TAFCA na FRAT ambao vitawakilishwa na mwenyekiti na katibu”,alisema Gunda.