USO KWA USO WENGER NA MOURINHO

Upinzani wa Arsene Wenger na Jose Mourinho ni kitu cha wazi huko England kwa Miaka mingi na Wikiendi hii watakutana tena lakini itakuwa ni mara yao ya kwanza kuvaana tangu Mourinho awe Meneja Mpya wa Manchester United.

Jumamosi Manchester United na Arsenal watacheza huko Old Trafford Jijini Manchester kwenye Mechi ya EPL, Ligi Kuu England.

Lakini Wenger amesema tripu hiyo ya Arsenal huko Old Trafford ni Gemu tu kati ya Klabu mbili na si Mameneja Wawili.

Akiongea na Wanahabari hii Leo kuelekea mtanange huu wa Jumamosi, Wenger ameeleza: “Sidhani kama napaswa kuelezea uhusiano wetu. Yeye atapigania Timu yake na mimi nitapigania yangu. Hicho ni kitu cha kawaida!”

Aliongeza: “Siweki Gemu hizi kama ni Mashindano kati ya Mameneja Wawili. Najua Watu wanataka kutengeneza uhasama lakini hilo halileti Washabiki. Kitu ambacho kinavuta Washabiki ni Gemu yenyewe na ubora wake. Ni muhimu iwe Gemu ya hali ya juu ili kuijengea sifa Ligi Kuu. Hilo ni juu yaWachezaji Uwanjani.”

Alipoulizwa kama atapeana mkono na Mourinho, Wenger alijibu huku akitabasamu: “Ni wazi kitu hicho. Naheshimu utamaduni huo kwenye Ligi Kuu.”

-Mourinho na Wenger washapambana mara 14 kwenye Ligi Kuu England na Wenger hajashinda hata Mechi 1.

-Mourinho, akiwa na Chelsea, ameibuka Mshindi mara 8 na Sare 6.

-Mara pekee kwa Wenger kumbwaga Mourinho ni Agosti 2015 kwenye Mechi ya kugombea Ngao ya Jamii.

Kwenye Mechi hii ya Jumamosi, Man United itamkosa Straika wao Zlatan Ibrahimovic ambae yupo Kifungoni Mechi 1 baada ya Kadi za Njano 5 lakini Wenger amemnyooshea kidole Kinda Marcus Rashford ambae kwenye Mechi ya mwisho kati yao, Mwezi Februari, alifunga Bao 2 wakati Man United inaichapa Arsenal 3-2 na kuing’oa kwenye Reli ya kusaka Ubingwa Msimu uliopita.

Wenger amesema: “Mtu alietuua sisi ni Rashford. Hivyo tusidhanie udhaifu wa Man United! Msimu uliopita tulipoteza Gemu 1 tu ya Ugenini, huko Old Trafford. Na hiyo ilikuwa Gemu muhimu kwetu na tukapoteza mwelekeo!”

-Tangu Ligi Kuu England ianzishwe Msimu wa 1992/3, Arsenal wameshinda mara 3 tu Old Trafford katika Mechi 24.

Baada ya Mechi 11, Liverpool ndio Vinara wakiwa na Pointi 26, Chelsea ni wa Pili wana 25, wakifuata Man City na Arsenal wenye 24 kila mmoja, Tottenham wa 5 wakiwa na 21 na Man United ni wa 6 na wana 18.

Katika Mechi zao za mwisho za EPL kabla hawajapisha Mechi za Kimataifa, Arsenal walitoka 1-1 na Tottenham katika Dabi ya London Kaskazini na Man United kuitandika Swansea 3-1 huko Liberty Stadium, Wales.