JESHI LA POLISI NCHINI LIMEAGIZWA KUKAMATA WALE WOTE WANAOWEKA MAWE BARABARANI

Mh Mwigulu Nchemba Waziri wa mambo ya Ndani

WAZIRI wa mambo ya ndani Mwigullu Lameck Nchemba,ameliagiza jeshi la polisi nchini,kuwakamata na kuwafikisha kwenye vyombo vya sheria madereva wanaoacha mawe na matawi ya miti barabarani.

Nchemba ambaye pia ni mbunge wa jimbo la Iramba mkoani hapa,ametoa agizo hilo juzi wakati akizungumza kwenye kikao cha 38 cha bodi ya barabara mkoa kilichofanyika kwenye ukumbi wa mikutano wa ofisi ya mkuu wa mkoa mjini hapa.

Alisema baadhi ya madereva wa magari na hasa yale makubwa,hutumia mawe kuzuia magari yao kutembea wakati wakiyafanyia matengenezo ya dharura.

“Wakiisha maliza kuyafanyia matengenezo magari yao,madereva hao huyaacha barabarani mawe na matawi ya miti ambayo hutumika kutoa tahadhari kwa vyombo vingine vya moto.Kitendo hicho kinahatarisha maisha na mali za watumiaji wengine wa barabara, kwa vile yanaweza kusababisha ajali”,alisema Mwigullu.

Kwa hali hiyo,alisema jeshi la polisi linapaswa kuimarisha mawasiliano ili waweze kuwathibiti na kuwakamata madereva wanaoacha mawe na matawi ya miti barabarani.

Katika hatua nyingine,waziri huyo alisema upo umuhimu mkubwa wananchi na hasa wale wanaoishi kando kando ya barabara,kuelimishwa juu ya matumizi bora ya barabara zinazojengwa kwa fedha nyingi,ili waweze kuacha kupitisha mifugo yao na mikokoteni barabarani.

Kwa upande wake mwenyekiti wa bodi ya barabara na mkuu wa mkoa wa Singida,mhandisi Mathew John Mtigumwe,aliagiza kuwa fedha zinazotolewa na serikali na wafadhili mbalimbali wa miradi ya barabara,matumizi yake yasimamiwe kikamilifu, ili zitumike kwa miradi iliyokusudiwa.

“Ujenzi wa miradi hiyo ya barabara ufanane na thamani halisi ya fedha zilizotumika.Pia kazi za ujenzi wa barabara za ngazi zote,wapewe wakandarasi bora na wenye uwezo wa kutekeleza miradi ikakamilika kwa wakati.Nasisitiza kuimarishwa kwa usimamizi na ukaguzi wa mara kwa mara wa miradi ya barabara ili barabara ziwe za kiwango kinachokusudiwa”,alisema.

Wakati huo huo,mhandisi Mtigumwe ambaye kabla ya kuteuliwa kuwa mkuu wa mkoa alikuwa meneja TANROADS mkoa,alitumia fursa hiyo kuupongeza uongozi wa TANROADS mkoa wa Singida chini ya meneja wale Eng.Leonard Kapongo,kwa kazi nzuri ya usimamizi na ukaguzi,uliopelekea miradi ya barabara kujengwa kwa ubora unaofafana na fedha zilizotumika.