UONGOZI WA BAKWATA WILAYA YA SINGINDA VIJIJINI WAMSIMAMISHA KAZI KATIBU WAKE

MKUTANO Mkuu wa Baraza kuu la Waislamu Tanzania (BAKWATA) Wilaya ya Singida vijijini umemsimamisha kazi kwa muda usiofahamika katibu wa Bakwata wa wilaya hiyo,Salumu Abrahamani Masaka kwa kutokuwa na imani na utendaji wake,kufuatia tuhuma mbali mbali zinazomkabili ikiwepo ya ubadhirifu wa fedha za baraza hilo.

Hayo yamebainishwa na Katibu wa Bakwata Mkoa wa Singida,Alhaji Buruhani Mlau kwenye mkutano mkuu wa Bakwata wilaya ya Singida vijijini uliofanyika kwenye ukumbi wa mikutano wa msikiti wa kati mjini Singida.

Akifafanua zaidi katibu huyo wa Bakwata Mkoa amezitaja sababu zingine zilizochangia Massaka kusimamishwa kazi kuwa ni ubadhirifu wa shilingi 640,000/=mali ya baraza hilo, kusababisha hasara ya amana ya waislamu wa wilaya ya Singida vijijini,kudanganya Jumuiya ya Akina mama wilaya ya Singida vijijini kwa kuchukua gunia moja la mahindi pamoja na kutoonekana hata kidogo mapato yatokanayo na usajili wa ndoa.

Hata hivyo awali mkutano huo ulipoanza nusura uingie dosari baada ya mmoja wa wajumbe wa Halmashauri ya Mkoa,Bwana Jumanne Nkii kutoa maelezo ambayo hayakuwapendeza wajumbe kutokana na kile walichodai kwamba mjumbe huyo ni moja ya watu wanaoihujumu Halmashauri ya wilaya ya Singida vijijini.

Wakichangia maelezo ya wajumbe kutoka Bakwata Mkoa baadhi ya wajumbe wa wilaya,Bwana Issah Mwiru ametaka kufahamu sababu zilizowafanya wao waitwe kwenye mkutano huo wakati walishakamilisha maamuzi yao ya kutokuwa na imani na mtendaji huyo na kufikia maamuzi ya kumsimamisha kazi.

Kufuatia mjumbe huyo kuhoji sababu za kuitwa kwao katika mkutano huo,ndipo Bwana Abdillah Mussa mmoja wa wajumbe wa Halmashauri ya Bakwata Mkoa aliposimama na kuwataka wenzake kuwa wakweli hata kama maneno hayo hayatakuwa mazuri kwa wengine na kuungana na wajumbe wa wilaya kumsimamishakazi Massaka hadi hapo tamko jingine litakapotolewa.